ਦ ਪਿਕਵਿਕ ਪੇਪਰਜ਼
ਦ ਪੋਸਥੁਮਸ ਪੇਪਰਜ਼ ਆਫ਼ ਦ ਪਿਕਵਿਕ ਕਲੱਬ (ਆਮ ਪ੍ਰਚਲਤ ਨਾਮ ਦ ਪਿਕਵਿਕ ਪੇਪਰਜ਼ ) ਚਾਰਲਸ ਡਿਕਨਜ਼ ਦਾ ਪਹਿਲਾ ਨਾਵਲ ਹੈ। 1836 ਵਿੱਚ ਪ੍ਰਕਾਸ਼ਤ ਸਕੈਚ ਬਾਇ ਬੌਜ਼ ਦੀ ਕਾਮਯਾਬੀ ਤੋਂ ਬਾਅਦ, ਉਸਨੂੰ ਇੱਕ ਉਭਰਦੇ ਲੇਖਕ ਵਜੋਂ ਚੱਲ ਰਹੇ ਪ੍ਰਕਾਸ਼ਨ ਪ੍ਰੋਜੈਕਟ ਵਿੱਚ ਯੋਗਦਾਨ ਪਾਉਣ ਲਈ ਕਿਹਾ ਗਿਆ ਸੀ।
ਸੰਖੇਪ ਸਾਰ
ਇਸ ਨਾਵਲ ਦੀਆਂ ਘਟਨਾਵਾਂ 1827–28 ਦੇ ਸਮੇਂ ਦੌਰਾਨ ਵਾਪਰਦੀਆਂ ਹਨ। ਆਲੋਚਕਾਂ ਦੇ ਇਸ ਸੰਬੰਧੀ ਮੱਤਭੇਦ ਵੀ ਹਨ।[1] ਨਾਵਲ ਦਾ ਮੁੱਖ ਪਾਤਰ ਘੁੰਮਣ ਫਿਰਨ ਅਤੇ ਤਿਕੜਮਬਾਜ਼ੀ ਦਾ ਸ਼ੌਕੀਨ,'ਪਿਕਵਿਕ ਕਲੱਬ' ਦਾ ਬਾਨੀ ਅਤੇ ਜੀਵਨ ਭਰ ਲਈ ਪ੍ਰਧਾਨ, ਸੈਮੁਅਲ ਪਿਕਵਿਕ ਸੁਝਾ ਦਿੰਦਾ ਹੈ ਕਿ ਉਸ ਨਾਲ ਤਿੰਨ ਹੋਰ ਪਿਕਵਿਕੀਅਨ ਦੋਸਤ (ਟਪਮੈਨ, ਸਨੌਡਗਰਾਸ ਅਤੇ ਵਿੰਕਲ) ਇੰਗਲਿਸ਼ਤਾਨ ਦੇ ਦੂਰ ਦੁਰਾਡੇ ਦਿਹਾਤੀ ਇਲਾਕਿਆਂ ਦੇ ਦੌਰੇ ਚੱਲਣ ਅਤੇ ਜੋ ਵੀ ਜਾਣਕਾਰੀ ਉਹਨਾਂ ਨੂੰ ਮਿਲੇ ਉਸਦੀ ਰਿਪੋਰਟ ਬਾਕੀ ਮੈਂਬਰਾਂ ਨੂੰ ਕਰਨ।[2] ਬਘੀ ਰਾਹੀਂ ਲੰਦਨ ਤੋਂ ਲਾਂਭੇ ਪੇਂਡੂ ਖੇਤਰਾਂ ਦੇ ਬਘੀਖਾਨਿਆਂ ਵਿੱਚ ਠਹਿਰਨ ਸਮੇਂ ਹੋਏ ਅਨੁਭਵਾਂ ਦੇ ਵਰਣਨ ਨੂੰ ਅਧਾਰ ਬਣਾ ਕੇ ਲੇਖਕ ਨੇ ਉਥੋਂ ਦੇ ਨਿਆਂ ਪ੍ਰਬੰਧ, ਜੇਲ੍ਹਾਂ, ਅਦਾਲਤਾਂ, ਕਲੱਬਾਂ, ਮਨੋਰੰਜਨ, ਰੁਝੇਵਿਆਂ, ਹਾਸੇ ਠੱਠੇ, ਦੋਸਤੀਆਂ, ਸਮਾਜਿਕ ਪਰਿਵਾਰਕ ਰਿਸ਼ਤਿਆਂ, ਆਵਾਜਾਈ ਦੇ ਪ੍ਰਬੰਧਾਂ, ਵਰਤੋਂ-ਵਿਹਾਰ, ਖਾਣ-ਪਾਣ, ਪਹਿਨਣ ਦੇ ਨਿੱਕੇ-ਨਿੱਕੇ ਵੇਰਵਿਆਂ ਨਾਲ ਸਮਾਜੀ ਜੀਵਨ ਦੀ ਬੜੀ ਪ੍ਰਮਾਣਿਕ ਤਸਵੀਰ ਇਸ ਨਾਵਲ ਵਿੱਚ ਕਲਮਬੰਦ ਕੀਤੀ ਹੈ।